Moi boas, son Antonio Barral e teño 53 anos. Traballo como xefe de produción dunha empresa de dragados.

Dende a miña experiencia no mundo do mar, aposto firmemente pola nosa ría como futuro da nosa vila. Podemos recuperar espazos produtivos tal e como se está facendo noutros puntos do planeta.

Vendo que os partidos políticos que están no noso concello non queren chegar a acordos neste tema tan importante, aposto pola Marea como garantía do interese xeral e do ben común.

Quero que os meus fillos e os meus netos poidan ter acceso ao traballo e vivir no pobo! 

Os grupos de traballo presentarán ante a Asemblea Cidadá as dezanove medidas clave para que sexan sometidas a debate polo órgano máximo de decisión da Marea Cidadá e se tomen como punto de referencia para que o equipo redactor do programa electoral inicie o seu labor.

A xuntanza será o martes 28 de abril ás 21:00 no edificio administrativo do Espirito Santo e pode participar calquera veciño ou veciña de Noia.

Tamén se terán en conta os aportes recollidos no Banco de Propostas da web da Marea.

Son Marisé López Pérez, noiesa de nacemento e de corazón.

Dende hai 20 anos exerzo como médica de familia en distintos puntos de Galicia e actualmente traballo no PAC de Santiago de Compostela,traballo que me permite sufrir como profesional e como paciente as consecuencias dos recortes e a paulatina privatización da sanidade pública.

Son Carlos Maquieira. Desde hai máis de vinte anos ensino grego no IES Virxe do Mar e nos últimos catro -consecuencia dos funestos recortes na educación pública- traballo tamén no IES Campo de San Alberto. En calquera caso, considérome un afortunado por exercer unha profesión que sinto como absolutamente vocacional.

Este venres ás 21:00 no Salón de Plenos do Concello elixírase a candidatura da Marea Cidadá de Noia nunha asemblea aberta, na que pode participar calquera veciño ou veciña, tanto presentándose como candidato como participando na votación.

Durante o proceso presentárase unha proposta de lista que pode ser emendada por calquera dos participantes da asemblea, a emenda pode ser total ou parcial e someterase a votación a man alzada.

Chámome Maria Martínez teño 38 anos vivo en Noia dende hai case 6 anos. Traballei nunha conserveira e agora desde hai uns anos son autónoma na nosa empresa familiar, unha embarcación adicada á pesca de artes menores, eu encárgome do transporte e venda de peixe .

Son Roberto Iglesias Romero,  veciño de Noia, teño 32 anos e traballo nunha empresa do sector eléctrico tendo a sorte de poder facelo na vila onde nacín e me criei despois de estar algún tempo traballando por fóra.  Estando especialmente sensibilizado como pai de dous nenos e estando agardando por outro, síntome comprometido ca Marea por ser un movemento aberto onde por riba de todo están as persoas e os seus dereitos básicos.

A Marea Cidadá de Noia  solicítalles ás demáis formacións que concorren a estas próximas eleccións do 24 de Maio, un debate público para mostrarlle á cidadanía cales son as súas propostas e dar a coñecer os proxectos que teñen para o futuro da vila.

A cidadanía debe coñecer de primeira man en voz dos  candidatos as propostas e solucións das distintas formacións,  para tomar a súa decisión tendo unha información real, non en base a uns programas incumpridos reiteradamente cada 4 anos e que teñen pouco valor para o electorado.

Son Santiago Avilés, teño 47 anos e levo máis de 15 traballando no mundo de internet, aínda que algúns me recordarán atendendo na Tasca Típica ou presentando o informativo de CanalTambre cuns pelos dignos de xulgado de garda. Os últimos anos estiven traballando como freelance, case por completo para empresas de fóra porque neste país o pouco traballo que hai ofrécese nunhas condicións que rozan o esperpento. Neste momento as cousas tampouco van moi alá por Europa adiante así que estou desempregado e sen ningunha prestación, que os autónomos diso non temos.

Son Amal Azzaoui, teño 40  anos e vivo en Noia. Comecei estudos universitarios de Lingua e Literatura Francesas no meu país de orixe (Marrocos), pero na actualidade atópome rematando a E S O debido ás trabas burocráticas e aos elevados custes económicos que conlevan as homologacións.